Sajak

KA MEKAH KA LEBAH KABAH

Karya  YUS RUSYANA

Pohara hebatna duh matak tibelat

Mun  pajar di wetan geus balebat

Nu ajeg rajeg samadhab papat

Sajuta saf!

 Pohara hebatna duh matak geueuman

Mun srangenge keur manceran

Nu ngacungkeun leungeun ngucapkeun takbir

Pertanda siap!

Pohara hebatna duh teuing ku sahdu

Mun srangenge tunggang gunung

Nu sujud nyuuh ka datar bumi

Maha Suci!

Pohara hebatna duh teuing ku tengtrem

Mun srangenge enggeus tilem

Anu calik tumaninah

Timpuh sumerah

Pohara hebatna duh pohara geugeutna

Mun layung kasilih peuting

Suara nu aweh salam

Ti dasar bayah

Pohara hebatna duh maha digjaya

Hiji agama

Nu ngarampakgerakkeun raga

Nu ngarumpuyuknyuuhkeun jiwa

Ngumandepkeun umat  ka Maha Esa

Pohara hebatna duh Maha Wijaya

Hiji agama

Nu  ngomandokeun siap ka medan jaya

Dua puluh opat jam lima kali sayaga

Ka legiun waja nu sajiwa

Najan dimana duh najan di mendi

Di mana-mana  tuh sabudeur bumi

Najan di mana di Indonesia

Di pakistan di Arabia

Di aljajair di tunisia

Di Maroko duh sategal dunya

Ka Mekah ka lebah Kabah

Ka hiji pusat pertanda takwa