GUNUNG TAMPOMAS
Karajaan Sumedanglarang mangrupa
karajaan nu subur ma’mur. Rahayatna hirup-hurip kalawan tengtrem. Salian ti teu
aya pangeusi éta karajaan nu kakurangan dahareun, katengtreman rahayat gé
minangka balukar tina kawijakan raja di éta karajaan nu adil, percéka, tur
wijaksana dina mingpin rahayatna.
Kaléreun karajaan Sumedanglarang
ngajunggiring hiji gunung nu pada nyebut Gunung Gedé. Di ngaranan kitu sotéh
duméh wangunna gedé tur jangkung. Eta gunung téh jadi bahan pananggeuhan
rahayat. Di éta gunung rahayat tatanén. Di éta Gunung rahayat ngarala hasil
leuweung. Ti éta Gunung tingburial cai airna ngamalir jadi cai-cai nu engkéna
digunakeun pikeun rupa-rupa kagiatan masarakat.
Hiji mangsa katengtreman rahayat
Sumedanglarang kaganggu. Sababaraha peuting lilana tina jero kawah Gunung Gedé
kaluar sora patingjelegur. Sorana mungguh matak kukurayeun, mungguh
pikakeutireun jeung matak geumpeur. Rahayat bener-bener tagiwur. Mun peuting
saréna teu tibra. Mun beurang barang dahar jadi suda. Barang gawé gé jadi teu
purun.
Nu haténa tagiwur téh lain ngan
rahayat hungkul. Raja éta karajaan mikir pikeun ngungkulan éta masalah. Antukna
éta raja téh tapa. Dina tatapana anjeunna méménta ka Nu Kawasa pikeun méré
bongbolongan ka dirina.
Hiji waktu, paménta éta raja téh
dikobul. Aya sora nu nongtoréng kana ceulina. Ceuk éta sora, kawah Gunung Gedé
bakal jempling sabihara-bihari deui
lamun ditumbal ku keris pusaka tuturunan para Raja karajaan Sumedanglarang.
Sanggeus ngadéngé ilapat kitu mah raja gé eureun tina tapana sarta langsung
ngalaksanakeun éta parentah ti Nu Kawasa téa.
Raja indit sorangan ka puncuk
gunung. Satepina di puncak Gunung, raja langsung nyabut keris sarta teu tata
pasini deui ngan keleweng baé éta barang pusaka téh dialungkeun kana
tengah-tengah kawah. Anéh bin ajaib. Dadak sakala cicing. Sora tingjelegur gé
harita kénéh jempé.
Lain deui bungahna haté raja. Pon
kitu deui haté sakumna rahayat karajaan nu ahirna pada apal kana éta kajadian.
Ti harita kawah Gunung Gedé tara motah deui kawas nu rék bitu. Ti harita ogé
éta Gunung téh dirobah ngaranna jadi Gunung Tampomas, nu hartina gunung nu
nampa emas. Maksudna narima pusaka raja nu dijieunna tina emas.
Tidak ada komentar:
Posting Komentar